Dez colectivos traballaron na elaboración das tradicionais coplas dos Maios de Verín, segundo confirmou esta mesma mañá Emilia Somoza, concelleira da área de Educación, Cultura e Festexos do Concello de Verín.
Seguindo a mesma liña que o pasado ano, o Concello de Verín celebrará a festividade mantendo a elaboración dos versos pero adaptados e optimizados para a súa lectura e difusión a través de internet e dispositivos móbiles.
Neste sentido, a concelleira de Cultura quixo destacar o "extraordinario esforzo e a implicación" que continúan a demostrar todos os colectivos participantes "posibilitando, grazas o seu gran traballo, que entre todos e todas manteñamos viva a esencia desta tradicional festa no actual contexto de limitacións polo covid-19".
Os centros educativos que están a elaborar coplas para esta fin de semana son o IES Xesús Taboada Chivite, o CPR María Inmaculada, o Colexio Apostólico Mercedario, o CEIP Princesa de España, o CEIP Amaro Refojo e o CRA Monterrei.
Ademais deles, a Asociación de Mulleres Rurais Flor da Xesta, o Conservatorio de Música, o Maio dos Patos e a Asociación Verinense Amigos da Música, tamén están preparando as súas propias coplas.
Así, Somoza agradeceu o "altruísmo e compromiso social das asociacións que, ao igual que os colexios e institutos que elaboran as coplas, non recibirán este ano ningún tipo de contraprestación por participar", permitindo así que o Concello poida doar íntegra a cantidade orzamentada para os Maios ao programa de atención ás necesidades básicas de persoas da comarca de Verín do CDR Portas Abertas.
Maios en época de coronavirus
Ata a chegada da pandemia, Verín celebraba os Maios coa venda das coplas para a recadación de fondos solidarios para as asociacións participantes, así como a elaboración dos Maios Florais.
As costumes mudaron debido ás restricións derivadas da actual situación sanitaria provocada pola pandemia, e o Concello de Verín decidiu manter o formato creado na pasada edición, destinando a cantidade orzamentada para devanditos festexos a fins sociais.