A familia de Eloy Luis André -Mourazos, 1876- decidiu doar 200 obras e diversa documentación deste doutor en Psicoloxía e Filosofía á Biblioteca municipal de Verín. Estes fondos están xa custodiados polos responsables do espazo -Aurora Prieto e Vicente Rodríguez- na zona adicada á cultura local. En concreto, trátase, segundo explicaron dende o Concello de Verín, de 200 obras -en varias edicións-, revistas e xornais da época nos que as publicou. Ademais, no depósito figuran ata medio centenar de carpetas que conteñen distintos escritos e materiais, como recortes de xornais ou mapas.
Os responsables da biblioteca realizan nestes intres un estudo e análise documental de toda a documentación que os netos de Eloy Luis decidiron achegar ata o centro de lectura verinés -o acto de entrega estaba axendado para a pasada Semana Santa pero, por mor da pandemia do covid-19, celebrarase, previsiblemente, no vindeiro mes de xullo-. Nestas tarefas de estudo están a colaborar, de xeito desinteresado, o investigador galego Xosé Ramón García Soto, Facultativo Psicólogo Especialista en Psicología Clínica do Equipo de Salud Mental Infanto-Juvenil de Burgos. Tamén Monika del Castillo e Rubén Couto na traducción dos distintos escritos orixinais en lingua alemá e transcrición dos mesmos e, adicionalmente, Miguel Losada, Secretario da Sociedade Antropolóxica Galega e colaborador habitual da biblioteca, que axuda na evolución dos traballos.
No espazo web da biblioteca-bibliotecadeverin.es- pódese atopar un pequeno espazo onde se achega unha noción previa sobre quen foi o "erudito Eloy Luis André". Tamén está dispoñible unha cronobibliografía básica para ampliar coñecementos ó respecto.
Emilia Somoza, concelleira de Educación Cultura e Festexos, quixo agradecer á familia de Luis André a importante doazón realizada. "Sen dúbida, supón unha importante ampliación do patrimonio cultural da nosa vila e unha gran achega para a nosa biblioteca", dixo a concelleira.
Un dos episodios máis coñecidos de Eloy Luis André está vencellado a "Variante André". Fronte a esta proposta promovida polo doutor en Psicoloxía e Filosofía, a opción que impuxo Fomento fai posible que hoxe o tren transite pola rochosa cerna do Macizo Central Galaico.
