Música e teatro ao aire libre percorrerán varias das aldeas de Riós

O Concello de Riós vén de presentar a súa programación cultural para este mes de agosto e que arranca hoxe no propio núcleo de Riós ás 20,00 horas.

O concello riense ofrece unha combinación de actuacións de teatro de rúa, a carga do da asociación cultural Namarella Teatro, creada no 2018 en Verín, que irán acompañadas pola música ao vivo da Banda de Gaitas de Riós, totalmente de balde.

Trala actuación no Riós, a seguinte parada será na Veiga do Seixo, o próximo 20 de agosto, ás 20,30 horas. A continuación, Namarella Teatro e a banda de gaitas actuarán na Reitoral da Chaira o 24 de agosto ás 21,00 horas.

Dous días máis tarde, o 26 de agosto, o teatro e a música ao aire libre daranse cita na aldea de Progo, a partir das 20,30 horas. E, finalmente, a última función de teatro de Namarella terá lugar o 28 de agosto en Cortegada, dende as 20,30 horas.