"Nós", un documental para impulsar o rural en Monterrei

O Auditorio de Verín acollerá a presentación de “Nós”, un proxecto audiovisual realizado polo Grupo de Desenvolvemento Rural (GDR) Monteval e producido por Claqueta Coqueta. A cita será o vindeiro 12 de decembro ás 19,00 horas.

“Nós”, concebido como unha curta documental ligada a unha webserie, apóiase en tres pilares básicos da realidade do rural: a infancia, os retornados e os maiores. “Os máis cativos como a esperanza e o xerme do futuro no rural, os retornados pola complicada situación derivada da covid e os maiores como unha homenaxe a toda unha vida vivindo nesta contorna”, apuntan dende o GDR.

O proxecto parte dunha formación, tomando como protagonistas a persoas sen preparación de cada un dos Concellos que conforman Monteval, as cales se lles proporcionaron ferramentas para o seu desenvolvemento diante das cámaras. “Queriamos darlle a maior veracidade e verosimilitude posible, mostrar un rural real”, afirman dende a organización.

Pola súa parte, Ana Pardo, xerente do GDR Monteval, destaca que a finalidade do proxecto é “potenciar o noso rural, noso territorio, a nosa forma de vida, cada vez máis valorada polos de aquí e polos de fóra. A curta sae do corazón dos nosos protagonistas, uns sentimentos e sensacións que vale a pena amosar”.

Ademais, dende a Asociación Monteval, coa intención de axudar sempre aos seus veciños, e ante datas sinadalas como o Nadal, acompañarase a presentación de “Nós” cunha campaña solidaria. A entrada do Auditorio, voluntarios de Cáritas Parroquial Verín estarán recollendo alimentos e xoguetes para repartir posteriormente entre os seus usuarios.