A redacción do proxecto da futura residencia de Laza xa ten adxudicatario

SERVIZO ASISTENCIAL

O escollido entre cinco estudos de arquitectura de diferentes puntos da xeografía española é un estudo de arquitectura de Ourense, A. Outeiriño A. de Paula S.L.P. Detrás deste estudo atópanse os arquitectos ourensáns Alberto de Paula e Aurelio Outeiriño

Imaxe de arquivo de José Ramón Barreal e Luis Menor durante unha reunión.

A construción dunha residencia de maiores no concello de Laza está agora un pouco máis preto. Se hai 10 díaz facíase oficial unha achega da Deputación por valor de 103.320 euros para a construción desta infraestrutura asistencial, agora o Concello lazao vén de anunciar a adxudicación da redacción do proxecto.

Tras resolver o concurso entre as cinco empresas que se presentaron, o importe total polo que se adxudicou a redacción do proxecto foi de 52.030 euros. Agora os arquitectos disporán de prazo ata o vindeiro 31 de agosto para facer entrega de toda a documentación do proxecto básico e de execución da residencia.

Comezo das obras

Segundo o calendario que manexa o Concello de Laza, e trala sinatura dos convenios pendentes, a súa intención é a de sacar a obra a concurso antes do remate de agosto, co obxectivo de iniciar as obras da residencia de maiores antes do final deste mesmo ano.

A futura residencia de maiores de Laza, que contará inicialmente con 24 prazas, é un proxecto financiado pola Xunta de Galicia a través do Consorcio Galego de Benestar, que se une ás achegas feitas ata agora pola Deputación de Ourense.

Contenido patrocinado