As persoas que se poderán beneficiar destas axudas son aquelas coidadoras habituais non profesionais que atendan de xeito continuado a unha ou máis persoas dependentes ou con discapacidade.
Ademais, o Concello lembra que son subvencionables os gastos xerados no ano 2024 entre as datas do 1 de xaneiro e o 30 de novembro.
Estas axudas concederanse mediante o programa Respiro Familiar para persoas coidadoras, e que consta de tres modalidades distintas.
A primeira chámase Respiro no fogar, e está dirixida a persoas dependentes ou con discapacidade que precisan recibir axuda no seu propio domicilio, e cun importe máximo de 1.000 euros por beneficiario ao ano.
A segunda modalidade conta coa mesma contía económica, pero destinada a financiar os gastos derivados da atención prestada nos centros de día.
Por último, hai axudas de ata 1.500 euros para financiar estadías en centros residencias de toda Galicia.
Os veciños interesados en beneficiarse destas axudas poderán obter información e presentar as solicitudes pertinentes a través dos Servizos Sociais do Concello.
