Últimas semanas para visitar a mostra de esgrafiado galego

A sala de exposicións Hospital da Trindade do Castelo de Monterrei acolle durante este mes de outubro unha mostra itinerante sobre o esgrafiado galego. Tras as pinturas da artista local Luz Novoa no mes de setembro, agora é a quenda de Mar López Sotelo, divulgadora cultural e investigadora, quen presentou a súa mostra en Monterrei.

A divulgadora amosa a técnica do esgrafiado, unha técnica de decoración con estilo propio en construcións do rural ao longo de toda Galicia sobre a que se realiza un estudo que leva anos e que se está a renovar de xeito continuado con recuperación de diversas representacións. “Cando descubrín a existencia dun estilo propio de esgrafiado galego a través dun estudo comparativo con outros estilos, comecei a realizar un estudo das representacións historiadas que aparecen nas fachadas das construcións do rural, intentando interpretar o seu significado”, explica a autora.

Horarios de visita

Aqueles que aínda non se achegaran a coñecer este sinal característico de Galicia, poden visitar a exposición de mércores a domingo en horario de 11,30 a 18,30 horas, pasando antes pola oficina de turismo de Monterrei, os que tamén ofrecen visitas guiadas, así como a posibilidade de subir a Torre da Homenaxe do Castelo e coñecer a Igrexa de Santa María de Gracia da fortaleza.