“Coa lingua fóra”, teatro da man da Universidade Laboral en O Carballiño

O Concello do Carballiño acolleu onte pola mañá a presentación da nova obra de teatro do grupo de teatro de pais e nais da Universidade Laboral de Ourense, “Coa lingua fóra”, unha adaptación da obra “Made in Galiza” de Séchu Sende, e que se representará no auditorio Manuel María da vila do Arenteiro o vindeiro domingo, ás 19,00 horas.

O acto contou coa presenza do concelleiro de Cultura, Diego Fernández, e máis da directora da peza, Ánxeles Álvarez. Fernández lembrou en primeiro lugar a “gran traxectoria” do grupo de teatro da Universidade Laboral ourensá, que xa actuara no Carballiño co gallo do ciclo de Teatro Amador para axudar á Ucraína.

Do mesmo xeito, agradeceu que o grupo siga “vencellado” á vila, e fixo un chamamento “á veciñanza” para que se anime a ver a representación do domingo. Ademais aproveitou para lembrar que este “broche de ouro” para o mes de setembro, estará seguido polo Festival de Teatro Amador e outras obras do teatro profesional galego que aterrarán no Carballiño.

Pola súa banda, a directora teatral Ánxeles Álvarez agradeceu ao apoio do Concello e do público local nas obras que anteriormente representou o seu grupo teatral, “Os vellos non deben namorarse” e “As Marías”.

Álvarez quixo salientar que esta adaptación da obra de Sende, que “desgraciadamente non poderá estar presente durante a representación”, responde a unha forma de tratar a “problemática do galego” dende o humor.