A Festa da Palabra enxalza nesta edición a Antón Tovar

A XI Festa da Palabra estará dedicada este ano ao escritor Antón Tovar. Celebrarase o día 20 do próximo mes de xullo, na Insua dos Poetas (Esgueva-Carballiño). O presidente da Fundación Insua dos Poetas, Luis González Tosar, sinala que se pensou en Antón Tovar (Rairiz de Veiga 1921-2004) como poeta, narrador e ensaista ourensán para promocionalo xa que como outros escritores da provincia "está absolutamente ignorado por a Real Academia Galega", e co fin de que forme parte da relación de escritores para ser protagonista no Día das Letras Galegas.

"A Fundación Insua dos Poetas o que persegue é promover aos escritores ourensáns para que teñan unha maior proxección, para unha maior difusión da súa obra e unha maior presenza no panorama literario de Galicia", apunta González Tosar.

No transcurso da Festa da Palabra haberá intervencións por parte de estudiosos da súa figura e recitais dos seus poemas, ademais dunha aportación musical baseada na súa obra. Con tal motivo, tamén se colocará un mural para exaltar a súa persoa e os seus versos. "No 2005 xunto con Marcos Valcárcel promovín a publicación da súa poesía en galego, en dous tomos ", explica o presidente da fundación.

Antón Tovar comezou a escribir a súa obra en galego no ano 1965 co libro "Arredores", sendo a súa última publicación "Cadáver adiado", do 2001. Na Insua dos Poetas tamén se conmemorarán os 98 anos do seu nacemento, segundo apuntaba Tosar.

Se a figura de Antón Tovar vai centrar unha boa parte dos actos desta xornada da palabra, tamén está previsto facer unha contribución á próxima gran celebración do ano 2020, que é o centenario da Xeración NÓS e da publicación en Ourense da súa revista impulsada por Vicente Risco, Antón Losada Diéguez, Ramón Otero Pedrayo e Florentino López Cuevillas, entre outros ourensáns. A Fundación Insua dos Poetas, con tal motivo, vai repartir un facsímil do primeiro número da Revista NÓS entre os asistentes á Festa da Palabra.

Outra iniciativa que se levará a cabo ese día será de recoñecemento mediante a entrega dos Premios Insua dos Poetas a persoas ou entidades que destaquen xa sexa nas letras, no arte e medio ambiente, polo seu compromiso económico e social e por a laboura en comunicación e difusión cultural. Será o Padroado da Fundación Insua dos Poetas o que se encargue de elexir aos galardoados.

"Despois de 11 anos a Festa da Palabra é un evento consolidado e frecuentado por o mundo cultural de Galicia", conclúe Tosar.