Marisa Crespo recibe o V Premio Ágora do Orcellón

O Instituto de Estudios Carballiñeses concede o V Premio Ágora do Orcellón a Marisa Crespo Leiro, doutora en Medicina pola Universidade Autónoma de Madrid e Especialista en Cardioloxía polo Hospital Puerta de Hierro de Madrid.

O xurado deste premio estivo presidido por Avelino Muleiro García, filósofo e director do Instituto de Estudios Carballiñeses, e destaca de Marisa Crespo que é profesora na Universidade de A Coruña; responsable da Unidade de Insuficiencia Cardíaca Avanzada e Transplante Cardíaco no CHUAC; colaboradora do Centro de Investigación Biomédica na Rede Cardiovascular CIBERCV, pertencente ao Instituto de Salud Carlos III; coordinadora do Grupo de Investigación de Insuficiencia Cardíaca Avanzada e Transplante Cardíaco do Instituto de Investigación Biomédica de A Coruña; articulista; membro Honorario Internacional da Heart Failure Society of America, entre outros méritos, ademais das súas importantes cualidades humanas, a súa entrega e dedicación aos pacientes e o seu compromiso coa Sanidade pública. O Colexio Médico de A Coruña xa lle concedeu a máis alta distinción deste organismo: a medalla de ouro e brillantes.