A Veracruz pon en valor a arte en pedra de Galicia

Felipe-Senén, carballiñés, arqueólogo e historiador da cultura galega, con motivo do 150 aniversario do nacemento en Porriño de Antonio Palacios, fixo un amplo recorrido a traves da súa singular e monumental obra, con dedicación especial ao carballiñés templo da Veracruz ( 1943-1952), “edificación cargada de simbolismo e galeguismo, seguindo os presupostos que caracterizaron á xeración Nós e dos que tanto se falaba nos parladoiros intelectuais do Balneario de Mondariz”, segundo apuntou.

En arquitectura, sinalou Felipe-Senén, a Veracruz é o monumento no que Palacios pon en valor a pedra de Galicia, o artesanado, en especial aos canteiros, asi como á historia da arte galega.

Este acto, que se celebrou onte na Casa da Cultura do Carballiño, o conferenciante quixo que fora tanto un recoñecemento do arquitecto como da familia Otero, “constructores que seguiron e se identificaron íntegramente co 'espirito do arquitecto', destacaba.

A conferencia “A Veracruz do Carballiño: testamento arquitectónico de Palacios” foi organizada polo Centro de Estudios Chamoso Lamas en colaboración co Concello, coincidiendo coa efemérides do nacemento do arquitecto, o día 8 de xaneiro de 1874.

O acto enmárcase dentro do programa que elabora o Concello do Carballiño polo aniversario.