A compañía ourensá Sarabela Teatro presenta hoxe na Mostra Internacional de Teatro de Ribadavia a exitosa obra “A lingua das bolboretas”, da que é autor o escritor Manuel Rivas. A dramaturxia e dirección están a cargo de Gonçalo Guerreiro, e figuran como interpretes Elena Seijo, Josito Porto, César Goldi, Fernando Dacosta, Fran Lareu, Sabela Gago e Fina Calleja. Será ás 23,00 horas no Auditorio Rubén García, no castelo.
Trátase da cuarta colaboración desta compañía co autor, despois de “O lapis do carpinteiro”, “O heroe” e “Os libros arden mal”, que foi unha lectura dramatizada. Se con “O heroe”, Sarabela Teatro celebrou os seus 25 anos, con “A lingua das bolboretas” celebra o 40 aniversario.
A compañía Larraitz Urruzola Producións Artísticas presentou onte en San Cristovo o seu espectáculo de títeres “Fábulas de Montaña”, que hoxe se poderá ver na praza da Franqueirá, ás 21,00 horas. Larraitz Urruzola e Merran Laginestra son os interpretes dirixidos por Ignacio Vilariño, que tamén é autor do libro que leva o mesmo título, e que se presenta ao remate da función.
“A obra está basada nas Fábulas en verso orixinais de Concepción Arenal, foi o seu primeiro libro editado, que daquela tivo acollida nas escolas, pero que pola súa lenguaxe ardua, con fábulas demasiado extensas para os nenos, foi retirado”, apunta Ignacio Vilariño. A súa versión recupera ese texto e faino máis asequible, tendo como protagonistas aos animais da montaña de Cantabria como o oso, o lobo e os cans.
Así, a obra teatral transmite “as leccións didácticas que quería dar Concepción Arenal, ademais da biografía da súa mocidade”, explica Vilariño. Desta maneira aborda “a autonomía e a independencia da muller, tendo en conta que ela rompeu con todo indo naqueles tempos a universidade, publicando libros, e poñéndose ao par dos homes co seu discurso e o seu pensamento”, engade o director.
Larraitz Urruzola interpreta a Concepción Arenal, que cos títeres na súa saia-teatriño presenta momentos da súa mocidade e as súas fábulas. Merran Laginestra, no papel
de amiga da escritora, interpreta en directo temas populares e de Marcial de Adalid, compositor galego coetáneo da ferrolá e alcumado “O Chopin Español”.
Previamente, ás 20,00 horas, na Igrexa da Madalena, está previsto “Os actos da inercia”, de Javier Martín (Galicia), un espectáculo de danza con música en directo.
E como cada xornada, no patio de Turismo, ás 00,30 horas, terán lugar os coloquios teatrais do Foro MIT, neste caso coa compañía Sarabela Teatro, para falar da montaxe de “A lingua das bolboretas” e a estreita relación coas obras do escritor Manuel Rivas.