Paseo nudista por Melón

O nudismo, a doutrina que propugna a vida ao aire libre e en completa nudez (segundo a definición da Real Academia Galega), está ligada tradicionalmente a zonas de praia e solarium. Con todo, cada vez son máis as asociacións que organizan xornadas de sendeirismo nudistas e esta foi a proposta para a presentación de Naturigal nas pozas de Melón.

“Pensabamos que ía facer mellor tempo”, recoñecía o presidente do colectivo Luis González que, como bo ourensán, coñecía da beleza e armonía da zona fluvial, escenario ideal para a organización do primeiro acto público do colectivo. “Cando se fala de nudismo, pénsase inmediatamente en praias, pero o sendeirismo nudista é unha actividade que práctican moitas asociacións e, nesa liña, pareceunos que esta zona era moi apropiada. É moi bonita, con pozas e unha ruta interesante”, describía González.

Unha vintena de participantes chegados desde diferentes puntos de Galicia e mesmo doutras comunidades autónomas como Navarra, gozaron dunha xornada de confraternización e de natureza. “O sitio é espectacular, a auga… un pouco fría”, comentaban tras a subida ata a fervenza de Tourón.

A climatoloxía fixo que o paseo de hora e media de duración fora máis ben en solitario, pero os contados encontros con varias parellas de senderistas “téxtiles”, foron de normalidade e respecto absoluto no seu desexo de gozar da natureza en liberdade. Como punto e final á xornada, os nudistas compartiron unha comida de confraternización ao carón das pozas, convite para falar do presente e futuro do colectivo e ao que se sumaron máis socios que non puideron estar na andaina.