O PP insta ao Concello a asfaltar dous camiños de terra

O grupo do Partido Popular de Ribadavia presentou unha solicitude no rexistro municipal instando ao goberno a acelerar a adxudicación da obra de mellora de camiños de acceso a parcelas agrícolas. Os “populares” sinalan que, ao tratarse de traballos de rega asfáltica, é mellor que se leven a cabo no verán para aproveitar as mellores condicións climatolóxicas.

As actuacións que se deben levar a cabo dentro deste programa, aprobadas e solicitadas polo goberno local, antes de que PSOE e Ribeiro en Común acordaran botar ao PP do goberno municipal, permitirán dotar de capa de rodadura asfáltica a dous accesos que teñen o firme de terra. Trátase dunha pista da concentración parcelaria en Santo André de Camporredondo, e do camiño das Ánimas Vellas, en San Cristovo de Regodeigón. Os populares agardan que o goberno de Ribadavia axilice a adxudicación e execución desta obra que permitirá mellorar estes dous viais que dan acceso a numerosas parcelas agrícolas e que, polo tanto, dan servizo a unha gran cantidade de veciños das localidades de San Cristovo e Santo André. As obras, proxectadas e solicitadas polo anterior goberno suporán para Ribadavia un investimento total de 36.633 euros na mellora destes dous camiños.