O alcalde afirma que nunca ocultou nada e que os datos que hai no concello están a disposición da oposición
O PSdeG-PSOE de Leiro acusa á Xunta de Galicia e ao Concello de ocultar de xeito “deliberado” información da realidade do investimento e a xestión do Hotel Monumento San Clodio e do Spa de Viñoterapia. Os socialistas sinalan que tras seis peticións de información solicitadas entre o 2017 e 2023 no Parlamento de Galicia, a única resposta foi o “silencio sepulcral e a ausencia de explicacións ao respecto”.
Reclaman coñecer os “motivos” polos que o investimento previsto entre 1999 e o 2000 de 2.650.602 euros e financiado por dúas consellerías e a Secretaría Xeral de Turismo, acabou por converterse en máis de 11.200.000 euros; e lembran que a explotación foille outorgada, mediante a sinatura dun convenio por parte da Xunta de Galicia, a orde relixiosa de Samos e o Concello de Leiro, ao grupo Hotusa para a súa explotación por un período de 25 anos.
O portavoz do PSdeG neste municipio, Manuel Rodríguez, considera “imprescindible” acceder ás cláusulas que regulan a concesión e a xestión, xa que “hai requirimentos que a empresa Hotusa non está cumprindo e que nin a Xunta, nin o Concello, teñen intención de facerlles cumplir”.
O alcalde de Leiro, Francisco José Fernández, refírese aos socialistas, manifestando que “levan 24 anos sen preguntar por San Clodio e eu nunca lles ocultei nada. Todos os datos que hai no Concello dánselle”, matiza.
