18 bares de Barbadás loitarán por ofrecer o pincho máis rico

“Os protagonistas desta fin de semana en Barbadás serán os hostaleiros”, anunciou onte a concelleira de Comercio do Concello de Barbadás, Marga Pérez. Co fin de dar impulso ao sector, o Concello organiza o concurso de pinchos “Barbadás a Bocados”, que se consolida como proposta gastronómica de referencia nesta sexta edición na que aumentan ata 18 o número de establecementos participantes nesta campaña, “que non supón ningún coste aos locais”. Os pinchos terán un prezo de entre 2 e 2,5 euros. O alcalde, Xosé Carlos Valcárcel, agradeceu a participación dos hostaleiros neste concurso “que xa está consolidado e que aposta polo noso produto e a nosa excelente gastronomía, que ten que ser valorada”.

Os días 15 e 16 de setembro ofreceranse os petiscos en horario de 19,00 a 23,00 horas, se ben na panadería Alento tamén poderán degustarse en horario de mañá. O resto de participantes son: La Carabela, Claret´s Food, Oren Express, A Cova do Sabio, O Muiñeiro, Cacho Pizza, A Solaina, Brétema, Tarona, Wakanda, Estilo 46, O Bar dos Patos, O Chicote, As Catro ás, A Nova Farola, O Carrabouxo e Estambul Kebab.

Os comensais deberán elixir o mellor pincho cubrindo a tarxeta de votación nun dos establecementos participantes e optarán así aos premios do sorteo: 6 cheques de 50 euros cada un para mercar no comercio local. A maiores da votación popular, un xurado profesional valorará cada unha das propostas tendo en conta a creatividade, preparación e calidade. Marga Pérez animou a todos os veciños e veciñas a probar as orixinais propostas gastronómicas.

Pero este ano, o certame chega con novidades. Ademais dos pinchos, o programa inclúe por primeira vez unha cata de aceites na que se darán a coñecer as diferentes variades. Será o venres, ás 18.30 horas no local social de Fonval. O sábado, para toda a familia tamén terá lugar un obradoiro de cociña interxeracional no que se compartirán receitas elaboradas con produtos dos colaboradores no concurso de pinchos. Ámbalas dúas actividades celebraranse no mesmo horario e escenario que a cata de aceite.

Cada ano son máis os locais de hostalaría de Barbadás que se suman a participar neste certame gastronómico que mesmo outros concellos da provincia imitaron o seu modelo de éxito en tempos recentes.