A Anpa do IES 12 de Outubro de Ourense esixe docentes en ciclos de FP

A asociación de nais e pais do IES 12 de Outubro do barrio da Ponteda cidade convocou para este luns ás 11:30 horas unha concentración para reclamar profesorado nos ciclos de Electricidade.

A Anpa advirte da “falta continuada” de docentes en “Instalacións Electrotécnicas”, que afecta aos ciclos formativos da familia de Electricidade e de FP Dual de Mantemento Electromecánico.

Desde o comezo do curso, varios grupos destes ciclos estiveron sen profesor para impartir esta docencia durante dous meses e, segundo a Anpa, “a carga lectiva dos módulos profesionais impartida por dito profesor é moi elevada, o que supón unha parte moi importante do currículo dos ciclos formativos”. Desde a Anpa din que estas horas serán “irrecuperables”.

O centro xa advertiu que faría falta outro profesor desta especialidade a partir da xubilación dun profesor a principios de novembro. Case un mes despois, o alumnado continúa sen substituto que imparta a materia.

A Consellería de Educación abriu listas de contratación de substitucións a finais de outubro e estas listas esgotáronse nun só día. Había 10 vacantes da especialidade sen cubrir en Galicia.

Mentres non se resolve o problema, o alumnado continúa sen recibir docencia, din na Anpa, “o que imposibilita unha formación acaída e a impartición da totalidade do currículo do ciclo que está determinado pola lexislación educativa da propia Consellería de Educación”.