Barbadás, récord de poboación con 11.171 habitantes

Barbadás rompeu o seu teito de poboación no 2023, acadando un total de 11.171 habitantes, a cifra máis alta dende que se rexistran no Instituto Nacional de Estatística (INE). O alcalde, Xosé Carlos Valcárcel, atribúe este dato “ao esforzo do goberno local por implantar políticas sociais, de conciliación, deportivas e culturais”. Para festexar este fito, os novos veciños de menor idade tiveron onte unha benvida especial: así, os 13 nenos de 0 a 3 anos empadroados no concello dende o mes de xaneiro foron recibidos na Biblioteca Municipal. A iniciativa repetirase cada dous meses.

O alcalde, Xosé Carlos Valcárcel, e a concelleira de Educación, Marga Pérez, saudaron aos cativos e entregáronlles unha caixa con agasallos de benvida que inclúe contos, entre outros regalos, e a folla de inscrición como novo socio da biblioteca. Tamén explicaron ás familias que a iniciativa desenvólvese dende o ano pasado co obxectivo de fomentar o empadroamento en Barbadás e inculcar a paixón pola lectura entre os máis pequenos.

O comercio local tamén colabora ofrecendo descontos especiais aos novos veciños. Preto de medio cento de caixas repartíronse dende o 2023 co lema “Os pés máis pequenos fan a pegada máis grande nos nosos corazóns. Benvido ao noso pequeno fogar”. Este é a mensaxe de benvida das caixas que o Concello de Barbadás entrega aos nenos empadroados de entre 0 e 3 anos. Con esta inciativa, o goberno local “tamén fai unha aposta decidida para fomentar a lectura entre os máis novos”. Outro obxectivo consiste en “achegar a biblioteca a todos os fogares”.