Xosé Carlos Valcárcel: “As políticas sociais axudan á xente nova a asentarse en Barbadás"

O alcalde Xosé Carlos Valcárcel fala da actualidade do Concello de Barbadás, fai un balance do pasado e amosa os obxectivos a cumprir de cara a un posible novo mandato.

Hai uns días houbo un acto de recoñecemento no Concello, a quen estivo dirixido?

En marzo cumpríronse tres anos desde que se inciou a pandemia. Quixemos homenaxear ás persoas que faleceron, ás que sufriron a covid e a todas as persoas que desinteresadamente colaboraron en aplacar e mitigar a situación de soidade e desamparo que sentiu moita da veciñanza, como son: Garda Civil, Policía Local, Protección Civil, sanidade e farmacéuticos, supermercados, transportistas ou mulleres que facían as máscaras, por exemplo. Merecen un recoñecemento especial polo traballo que fixeron.

Como actuou o Concello nese momento?

A través de Protección Civil, repartimos alimentos e medicación ás persoas que non podían saír da súa casa e brindouse atención psicolóxica a través dunha funcionaria do Concello. Repartimos fotocopias para que os nenos e nenas puideran proseguir os seus estudos. Na escola de música houbo clases vía telemática e demostrouse a importancia da implicación municipal.

Barbadás é un dos escasos concellos con saldo vexetativo positivo na provincia, inflúen as políticas sociais?

En Barbadás hai unha política de conciliación moi importante, temos atención temperá e os programa ‘Bos días cole’, o servizo co que se atende aos nenos e dáselle o almorzo por un euro diario, 20 euros ao mes. Eu penso que esas políticas de proximidade e axuda social promoven que se estableza a poboación moza, que son os que teñen fillos.

Como funciona o transporte?

Non é municipal, corresponde á Xunta. Aprobamos hai tempo os protocolos que nos permitían acceder ao transporte metropolitano. Adherímonos e somos pioneiros no uso da tarxeta metropolitana de Galicia. A viaxe custa 1,35 -que marca a Xunta- e temos as ordenanzas para que se reduza ó 35%. Para os estudantes custa 60 céntimos; pensionistas, 70 céntimos e persoas en situación de risco, gratuíto. O único que queda por que funcione é a área metropolitana de Ourense.

Barbadás é un dos concellos con impostos máis baixos, por que?

É o Concello da provincia que ten as taxas e impostos máis baixos -seguindo a lei-. O IVI está no tipo impositivo máis baixo. Por exemplo, un vehículo no Barbadás paga 35 euros ó ano de imposto de circulación. As actividades culturais son totalmente gratuítas. A piscina municipal son 6 euros anuais. O que nós recadamos é escaso e con iso temos unha execución presupostaria do 80%, que é moi alta. Por pór un exemplo, en Barbadás hai 11.000 vehículos e recadamos en torno a 380.000 euros en imposto de circulación. Tamén é unha política de aposta para que se sumen novos veciños e veciñas ao noso concello.

Hai que facer balance destes anos e encarar o futuro, que ten na súa axenda?

Primeiro, dicir que foi unha etapa moi ilusionante, pero tamén complicada. A pandemia marcou o noso traballo. A pesares diso, fomos quen de instalar luz led na Valenzá, de arranxar a Praza do Pumar, dotamos de moitísimos firmes ás rúas. Agora mesmo está en carteira e falado co Ministro de Cultura a ruta cultural, literaria e turística de Carmen Martín Gaite, que é unha escritora Premio Nacional de Literatura, Premio Nadal e Príncipe de Asturias moi vinculada a Piñor. Queremos poñer en valor o centenario do seu nacemento cara a 2025. Tamén a recuperación da Fervenza do Pisco, da que xa temos un protocolo asinado coa Confederación Hidrográfica de 400.000 euros; o posto da Garda Civil, que servirá para pór en valor a seguridade, que é esencial.

Con que proxecto dos realizados se sinte máis satisfeito?

Co centro de información á muller. Estamos atendendo a máis de 70 persoas, que non só corresponden ao municipio de Barbadás, tamén de fóra, incluso da cidade. E quero destacar unha iniciativa que nos custou, a Casa da Mocidade. Queremos dar formación aos mozos, evitar que teñan malos hábitos para o que axudan as escolas deportivas e os servicios sociais. Pero en canto a proxectos, o máis importante para min, foi dar atención esencial ás persoas que na pandemia estaban soas.