Festas populares e música, esa é a combinación que ofrece o festival “Xoldra de Aguiar”, que foi presentado onte. No acto de presentación participaron o vicepresidente de Deputación, César Fernández, o delegado da Xunta en Ourense, Gabriel Alén, e o alcalde de Pereiro de Aguiar, Luis Menor. O evento, que se celebrará o 30 de xullo nos Gozos, no concello de Pereiro de Aguiar, ten como principal obxectivo a posta en valor do rural coa cultura das festas populares como instrumento catalizador dun evento musical durante o día, desde a sesión vermú ata a noite, ademais de contar con programación infantil.
Trátase dunha iniciativa patrocinada por Turismo de Galicia, coa colaboración da Deputación de Ourense e do concello do Pereiro, onde a convivencia, a música e o bo ambiente serán os protagonistas dunha xornada na que os veciños poderán gozar dun evento no rural, ao aire libre, das actuacións dos grupos galegos “Lamtumbá”, “Os do Fuelle” e “Brinkadelia”. Tamén a gastronomía, que forma unha parte esencial de calquera evento destas características, terá presenza cun posto de polbo e comida tradicional galega, así como grupos de animación para nenos e nenas.
O prezo das entradas, á venda en Ataquilla.com, teñen un prezo individual de 15 euros, dos que 5 euros destinaranse ao Banco de Alimentos do Concello de Pereiro de Aguiar.