Daniel, Carlos, Gael, Laura e Santiago son uns cracks da robótica. Estes alumnos de 3º da ESO do Colexio Divino Maestro de Ourense veñen de gañar o Concurso Galego de Robótica “A maxia da robótica”, promovido pola plataforma Igaciencia para impulsar o galego na ciencia. Os cinco rapaces, titorizados polo seu profesor de Tecnoloxía, Daniel, foron os mellores programando o seu robot de lego nun encontro celebrado na Coruña.
Os ourensáns acadaron o primeiro premio da edición número 14 dun concurso ao que se presentan centros educativos de toda Galicia. En total, 200 estudantes. No Divino Maestro non é a primeira vez que participan. Levan anos fomentando o uso da robótica nas clases. “É unha temática que lles motiva, levamos un robot á aula e poden probar cousas e van descubrindo a facelas. Os rapaces sinten esa curiosidade pola tecnoloxía”, explica o docente.
“Tiñamos que facer varios retos co robot, como facer que se movera, que xirase… Que seguise as ordes”, explica Gael, un dos galardoados. “Cada reto ía valendo puntos e pouco a pouco variaba a dificultade”, engade Laura, a única rapaza do equipo gañador.
“Estamos encantados de que os nosos alumnos puidesen coñecer o potencial da robótica e de que obtivesen este importante recoñecemento ó seu esforzo destes anos de traballo”, trasladan desde o Divino Maestro. Os 300 euros de premio para fomentar as habilidades tecnolóxicas e científicas xa están no colexio, co obxectivo de mellorar esta aprendizaxe tan práctica. Xa están pensando que facer cos cartos: invertir nun dron para seguir fomentando as habilidades tecnolóxicas aprendidas na aula.
