Manzaneda, Queixa e Castrelo de Miño únense a dar pulo ao rural

Chandrexa de Queixa, Manzaneda e Castrelo de Miño son os tres concellos ourensáns que destacan como protagonistas do V programa Holapueblo, unha iniciativa que busca revitalizar as áreas rurais en España.

Con identidades marcadas como a “serra e a auga” en Chandrexa, a “terra da castaña” en Manzaneda ou a “Ría do Ribeiro” en Castrelo de Miño, estes municipios, xunto cos lucenses Ribas do Sil, Folgoso do Courel e O Incio representan nesta plataforma o potencial do rural galego para atraer vida e emprendemento á súa contorna rural.

Este programa conecta persoas interesadas en trasladarse e abrir un negocio no rural con localidades que ofrecen oportunidades únicas. A plataforma Holapueblo promove unha loita directa contra o despoboamento, e nela os interesados poden atopar información detallada sobre cada concello seleccionado na web do programa, onde fichas descritivas e un mapa interactivo axudan a comprender o encaixe entre emprendedores e os pobos galegos.

A iniciativa aposta polo futuro das montañas da Ribeira Sacra e o Ribeiro, e engaden que tamén sitúa estas rexións no mapa de territorios rurais con capacidade de innovación e acollida. Os emprendedores que desexen cubrirán un formulario e a súa proposta será avaliada segundo as características dos concellos.