Os municipios pequenos gastan máis en servizos públicos básicos

Os concellos pequenos destinan ata 426 euros por cabeza a servizos básicos como a seguridade, vivenda, urbanismo, benestar e medio ambiente. É unha das principais revelacións dun documento publicado o mércores polo Observatorio Municipal Galego da Rede Localis, elaborado polo profesor da Facultade de Ciencias Empresarias e Turismo do campus de Ourense e codirector da rede, Alberto Vaquero.

A medida que aumenta a poboación, explican dende a entidade, “é habitual que aumente non só o número, senón tamén a calidade do servizo” debido ós maiores recursos do concello. Por exemplo, os concellos de ata 5.000 habitantes teñen que dedicar unha parte maior dos seus orzamentos a pagar os intereses da débeda pública. Ademais, “vense obrigados a destinar moitos máis fondos por habitante a servizos públicos básicos, en termos absolutos, que outros municipios con máis poboación”.

Os resultados obtidos, comentan, “deben facernos reflexionar sobre o tamaño da planta local” e as actuacións que poden mellorar o emprego dos recursos públicos “garantindo a máxima cobertura e eficiencia”. Neste sentido, tal e como trasladan dende a entidade, “pódense citar as fusións de municipios, creación de mancomunidades, prestación conxunta de servicios a través de consorcios, áreas metropolitanas ou colaboración máis activa coas deputacións provinciais”.

A Rede Localis está xestionada polo grupo de investigación Governance and Economics Research Network (Gen) da Universidade de Vigo, e é unha das actividades da Cátedra de Bo Goberno Local.