Fernando Suárez: “Os novos titulados de Intelixencia Artificial terán o futuro asegurado"

Fernando Suárez (Ferrol, 1973), licenciado en Informática pola Universidade da Coruña, preside o Colexio Profesional de Enxeñaría Informática de Galicia (CPEIG). O colectivo congratúlase da futura implantación dun grao e dun mestrado en Intelixencia Artificial con tres sedes: as tres escolas informáticas galegas. Ourense, A Coruña e Santiago contarán con este proxecto, se as negociacións avanzan, no curso 2022-2023. Ourense terá 50 prazas para o grao e 20 para o mestrado. Que significa o reto da Intelixencia Artificial para Galicia e, especialmente, para Ourense? É un proxecto fundamental para o futuro tecnolóxico de Galicia. En que pode diferenciarse Ourense do resto de escolas de Galicia con este novo proxecto? Ourense pode aportar a cercanía para captar talento. Ao igual que as demais, ten un profesorado capaz de formar líderes. Ten a súa diferenciación no tecido socioeconómico. Hai empresas da automoción, empresas líderes como Coren… Estas tecnoloxías poden axudar a impulsar estes sectores para que sexan referencia internacional. A Intelixencia Artificial vai aplicarse a todos os sectores. No rural temos a potencialidade do sector primario, do turismo... A IA pode dinamizalo e impulsalo. Especializarse en sectores do rural é unha oportunidade? Si. Temos dispersión poboacional e forza do sector primario. Temos que revertelo para que sexa unha potencialidade. No ámbito turístico, que Ourense é a gran descoñecida e ten moito atractivo, pódese aproveitar. Vemos que o rural está a xerar moitísimo atractivo, hai unha oportunidade para potenciar todo isto e a Intelixencia Artificial pode ser catalizador para acelerar estes procesos. Como facelo tanxible? Que lle aporta a intelixencia artificial a ese Ourense descoñecido? Estamos no inicio da revolución. Somos usuarios da IA sen sabelo, cos móbiles, por exemplo. Pódese facer tanxible con cousas que non eramos antes capaces de visualizar. Por exemplo, aplícase moito en imaxe médica. Moitas veces son capaces de descubrir cancros que escapan ao ollo humano. Se o trasladamos a agricultura, seremos máis produtivos en colleitas, combate de pragas...Cada vez hai máis sinerxias entre sectores que ata agora eran inconexos. Imos cara un futuro tecnolóxico que vai marcar o noso día a día. Cal será o perfil de alumnado? Agora temos un problema de demanda non satisfeita de profesionais en informática. Paro negativo. Unha carreira na que non hai paro ten moito atractivo. A IA ten un atractivo que talvez non soubemos trasladar coas enxeñarías. Temos un problema importantísimo de falta de demanda de mulleres na informática. Creo que a IA pode reverter isto, porque a sociedade percibe claramente que se aplica a múltiples campos. A demanda de alumnas de informática podería ter a solución con Intelixencia Artificial? Imos ter 210 prazas novas. Con isto non se soluciona o problema, pero é importante. A demanda das empresas vai tirar destes profesionais. Os que saian destas titulacións teñen o futuro asegurado. Valoramos esta unidade de acción entre as universidades e a Xunta, máis alá de que moitas veces as inversións en infraestruturas se valora moito e non tanto certos intanxibles como pode ser isto. Ese cambio é necesario. Cambiar obras por talento? Efectivamente. Está demostradoque Ourense e Galicia teñen talento, podémolo traer tamén de fóra sen eclipsar o que hai aquí, hai que retroalimentarse. O talento é de todos e temos unha oportunidade de cambiar obras por talento, por capacidade de construír esta nova sociedade. Se Informática ten paro cero, é previsible que ocorra o mesmo con Intelixencia Artificial? Sen dúbida. Pero sería fundamental non só formalos, senón retelos, producindo en Galicia e que continúen o seu labor profesional aquí. Que queden. É fundamental. Demos o primeiro paso de crear unha titulación de alta demanda pero hai que asegurar que somos capaces de retelo. Iso pasa por políticas salariais, de incentivar un sector produtivo que pode exportar a todo o mundo e sen custos demasiado elevados. Como de optimistas son cos prazos? Haberá proxecto en 2022? É o compromiso. Podemos ser optimistas. Non é profesion de futuro, senón de presente. Agardo colaboración de empresas e universidades, que é fundamental. E as administracións? Sen dúbida, a administración ten que ser líder no cambio. A pandemia axilizou a adopción masiva da tecnoloxía por parte da sociedade. Ourense quería exclusividade, Santiago tamén. Como convencernos de que un proxecto entre tres universidades é boa idea? É importante fomentar as COR (colaboración, cooperación e cocreación). Non teñen sentido as guerras individuais, senón ver isto como unha oportunidade de país. Ten algo que dicir Ourense co Centro de Intelixencia Artificial de Jácome? Creo que si. Debería participar no que é a construción das titulacións, vaise nutrir deses titulados. É hora de deixarnos de minifundismos e vexamos que é un proxecto de país. As políticas individualistas non chegan a ningún sitio. Chegamos a tempo? En España, somos pioneiros. É unha oportunidade para que Ourense medre? Si. Temos que aproveitar os atractivos que temos como terra. Ourense pode ser unha “cidade intelixente"? Si. Como Deputación, temos un proxecto de turismo intelixente.. Temos oportunidades dos fondos de recuperación, que poden axudar a este cambio de tendencia e que a tecnoloxía nos acompañe a como queremos deseñar a cidade do futuro. Estamos no momento de soñar, de pensar como queremos que sexa o Ourense do futuro, construído da man destes profesionais da Intelixencia Artificial. Futuro. Cando se pode falar de proxecto consolidado? Temos que dar é pasos na adaptacion da industria para acoller a estes profesionais. Hai que empezar xa a atraer talento. n