O OUFF abre boca cunha exposición de Chema Prado o 14 de setembro

O 28º Ourense Film Festival (OUFF) abrirá boca nesta edición cunha exposición na que viaxes, cidades, arte e nomes propios do cinema compoñen a crónica fotográfica de Chema Prado (Rábade, Lugo, 1952), quen foi director da Filmoteca Española durante 27 anos.

“Series” é o título da exposición que se inaugura o próximo 14 de setembro ás 20,00 horas no Centro Cultural Marcos Valcárcel . “Polaroid”, “Nada que perder”, “Cidades” e “Infraganti” son os títulos das catro series que nos conducen pola experiencia vital e profesional de Prado en imaxes, na que o cinema e as viaxes, o amor pola arte e un extraordinario conxunto de figuras relevantes da industria coas que colaborou e trabou amizade, desfilan na mostra.

A exposición “Series” de Chema Prado, presentada polo 28º Ourense Film Festival, organizado pola Fundación Carlos Velo co patrocinio da Deputación de Ourense e a colaboración de Xunta de Galicia, poderá ser visitada no Valcárcel ata o 12 de novembro.

Chema Prado é un referente para o sector cinematográfico desde hai décadas; non só en España senón no ámbito internacional, onde foi recoñecido e homenaxeado en diferentes foros e festivais. Foi director da Filmoteca España ata o ano 2016.

A vixésimo oitava edición OUFF celebrarase en Ourense do 29 de setembro ao 8 de outubro.