Os deputados do Partido Popular polas provincias de Ourense e Lugo -Celso Delgado, Ana Vázquez, Jaime de Olano e Joaquín García- anunciaron este sábado que esixirán a rectificación do Ministerio de Transportes, Mobilidade e Axenda Urbana (MITMA), así como de Adif, sobre a "inxustificada pretensión" de eliminar as variantes dos Peares-Canabal e Rubián (entre Bóveda e Sarria) previstas e comprometidas no plan de modernización e mellora da liña ferroviaria Ourense-Lugo.
Dúas variantes que reducirían ata en 23 minutos o percorrrido dos 117 quilómetros que separan por tren ambas as dúas capitais, "e cuxa construción permitiría aos lucenses aproveitar a conexión do AVE en Ourense e viaxar a Madrid en pouco máis de tres horas e cuarto", afirmou o deputado ourensán Celso Delgado.
Os representantes populares fixeron este anuncio na estación de Monforte de Lemos, onde na compaña de senadores lucenses e da presidenta provincial do PP de Lugo, Elena Candia, confirmaron que rexistraron a solicitude de comparecencia no Congreso do ministro de Transportes, José Luis Ábalos, e da presidenta de Adif, Isabel Pardo de Vera, co obxectivo de que rectifiquen "a súa intención de non executar esas dúas variantes".
Esta cuestión xa motivara o pasado mes de febreiro unha iniciativa parlamentaria "na que só obtivemos respostas evasivas e sen concreción sobre o momento administrativo destes proxectos e as datas que se manexan para a súa licitación", criticou Delgado.
A cita dos deputados populares en Monforte de Lemos tivo ademais un "particular significado", destacan, pois foi nesta vila onde compareceu o pasado 12 de marzo a presidenta de Adif para facer balance das actuacións en marcha e previstas para a modernización do corredor ferroviario Ourense-Monforte-Lugo, "sen que fixera referencia algunha a estas variantes tanto na súa intervención oral como na nota de prensa que con posterioridade distribuíu Adif", critican desde o PP.
Na situación actual, engaden os populares lucenses e ourensáns, "os trens máis rápidos invisten 94 minutos na viaxe entre Ourense e Lugo, cunha velocidade media de 74 quilómetros por hora que se elevaría ata os 85 coas melloras e electrificación da vía entre Monforte e Lugo".
Celso Delgado engadiu un dato máis, subliñando que Pardo de Vera "faltou á verdade", cando nunha entrevista publicada na prensa o 14 de marzo afirmaba que "cando cheguei non había nada sobre Lugo-Ourense, nin sabíamos canto medían os túneles". O deputado popular cualificou esta declaración como "un disparate".
