Simone Saibene: "Estamos facendo un programa de resistencia cultural, dende a periferia"

Simone Saibene conduce Cinephilia, o espazo adicado ó cine de Noveolas Producciones e Telemiño. Foi galardoado onte na categoría de mellor programa, repetindo a estatuíña que conseguira en 2021. Era o terceiro ano no que Cinephilia aspiraba a facerse cun galardón na gala dos Premios Mestre Mateo, con tres candidaturas: mellor programa, mellor realización e mellor comunicador. Finalmente recuncou, sumando un novo éxito tras 181 programas que se levan emitindo dende o ano 2019.

Parabéns! Como o recibe?

Moi contento, moi agradecido ós académicos e ás académicas. É a segunda vez que se confirma Cinephilia como programa gañador.

É o terceiro ano no que Cinephilia é finalista.

É o terceiro ano e ademais gañamos o primeiro ano como mellor programa. Como comunicador estiven nomeado xa tres anos, e este ano xa como realizador tamén. Como realizador gañei o ano pasado o premio Crea. É unha satisfacción máis.

Esperaba gañar un novo premio Mestre Mateo?

Non. Xa é complicado entrar entre os finalistas. Estamos falando de máis de 30 programas que teñen unha visibilidade e un orzamento moito maior con respecto ó noso. Sempre estamos facendo un programa de resistencia cultural, dende a periferia. Si que é verdade que en Ourense se ve, a través de R Televisión pode verse en toda Galicia, tamén en Youtube… Pero sobre o papel non podemos competir coas grandes producións. Con todo, seguimos estando aí. Entrar entre os finalistas é unha cousa enorme, estar en tres categorías aínda máis, gañar xa é a máxima das satisfaccións… e repetir! É dobre satisfacción, o inesperado, é gañar o imposible.

Esta noite foi a festa do cine ourensán, unha reivindicación do que se está a facer na provincia.

O ano pasado bateuse o récord de gravacións na provincia de Ourense. Iso xa é un feito histórico. Logo, que algunhas desas películas estean nomeadas a esta edición dos Mestre Mateo é outro aspecto que hai que valorar de forma positiva. E o feito de organizar os Mestre Mateo en Ourense, que non sexan sempre na Coruña ou en Santiago, é a coroación dun percorrido que comezou xa hai tempo aquí. É moi positivo.

Que lle queda por lograr?

Teño tanta satisfacción de ter gañado un premio en Ourense, a miña sociedade de adopción, que para estar satisfeito no meu percorrido persoal só me queda que me dean un premio de cidadán de adopción, de ourensán de pura cepa (ri).