O Nadal xa se respira nos concellos da provincia. As diferentes localidades programan os seus eventos que espallan a ilusión entre todos os veciños.
Na comarca da Limia, o concello de Xinzo xa ten o seu programa que comeza o domingo 17 e que se prolongará ata o 7 de xaneiro. Aínda que xa o sábado haberá unha bonita antesala coa Gala de Nadal do Colectivo Danzón. Ao día seguinte, o domingo 17, haberá unha Xuntanza Baby de Baloncesto Infantil (10,00 horas, Pavillón Municipal). A A.C. Teatro Aneis tamén terá a súa gala de Nadal este mesmo día (17,30 horas) no Auditorio da Casa da Cultura “Ángel Cocho”.
Para o 19 están previstos os concertos de Nadal do Grao Elemental do Conservatorio de Música (CMUS) no Auditorio da Casa da Cultura “Ángel Cocho” e ao día seguinte, a exhibición de Nadal de Capoeira no pavillón, así como os concertos de Nadal do Grao Profesional do CMUS.
O resto das agrupacións do conservatorio ofrecerán un especial concerto de Nadal o día 21 na Praza Maior de Xinzo (18,00 horas) das agrupacións do CMUS.
As actividades deportivas tamén teñen o seu espazo cun torneo 3x3 Sub-15 Base de Baloncesto, o día 22 mentres que o 23 será en categoría sénior.
O día 22, a Escola de Música da Limia ofrecerá un concerto de Nadal no Auditorio Casa da Cultura.
Un dos momentos máis esperados polos nenos será a Agrocabalgata de Nadal e visita de Papá Noel, o 23 de decembro.
Despois da Navidad, as actividades non paran. O 26 de decembro, Mini Torneo de Nadal de Fútbol sala, Xogos Infantís e Cantos e Contos de Nadal, XabaRace e Tributo a “O Rey León”. O 28, Animación Infantil con Superpandi e Gala do Deporte, Torneo Solidario de Fútbol sala Infantil, Gala da Cultura e Concerto de Cherry Sweet. O 30, Torneo Solidario de Fútbol sala Sénior, Obradoiro Infantil e Tributo a Joaquín Sabina.
O 31, badaladas de pre-fin de ano cun grupo musical. O 2 de xaneiro, música infantil con Pintura Semifusa Dúo e concerto de Aninovo da Agrupación Musical da Limia. O 3 de xaneiro, humor e acrobacias con Tom e Son de Nadal. Ao día seguinte, acrobacias e circo con CircoActiva. E o 5, a tradicional visita dos Reis Magos de Oriente.
Ademais, haberá a exposición “Abrandares: símbolo do rural da Escola Rural de Saúde da Limia“ na Casa da Cultura e Limialandia no Pavillón de Deportes.
Sandiás
Sandiás terá este Nadal unha programación de actividades para todos os públicos. Desenvolveranse seis temáticas propias destas festas: ambientación ou decoración, festa para os máis pequenos, música de cámara, maxia, recuperación de tradicións como os Reis Meigos e Cantar os Reis, a quinta campaña de solidariedade e o Festival co grupo Priscila.
En relación coa ambientación e decoración volve á casa do concello, a casa, o tren, os coellos, cervos, a ponte, o pescador e a presenza da torre do Castro, emblema simbólico do concello. A decoración abarcará tamén ás 18 aldeas do concello con pequenos pero significativos motivos do Nadal que acendan a maxia e a ilusión dos veciños nestas festas. O material será como sempre de baixo custo e con material reciclado modelado de maneira entusiasta polas brigadas do concello e a axuda de veciños. A festa para os máis pequenos estará protagonizada polo alumnado do Ceip de Sandiás e os máis pequenos do Punto de Atención á Infancia (PAI) o venres 22 de decembro. Non podía faltar nestas festas un espectáculo de maxia (“Un día máxico”) protagonizado polo mago e ilusionista Mago Albert o venres 29. A visita dos Reis Meigos aos máis pequenos será o venres 5.