A Xunta inviste na Peroxa 1,2 millóns nunha residencia

A conselleira de Política Social e Igualdade, Fabiola García, desprazouse onte ata A Peroxa e Vilamarín. Na primeira localidade visitou, acompañada do alcalde, Manuel Seoane, a parcela onde se vai construír unha residencia de maiores cun investimento total por parte do Goberno galego de 1,2 millóns de euros. A continuación achegouse ata Vilamarín para revisar xunto ao rexidor do Concello, Amador Vázquez, o terreo onde se edificará un centro de maiores financiado integramente polo Goberno galego con 600.000 euros.

Na visita a estes concellos, a conselleira destacou o compromiso da Xunta de Galicia coa universalidade e a proximidade dos servizos públicos, “do berce ao bastón e ata o último recuncho de Galicia”. Un modelo de atención e coidados que na Peroxa e en Vilamarín se traduce “en medidas como o Bono Residencia, o Bono Coidado ou o Servizo de Axuda no Fogar, dos que se benefician veciños destas localidades”, sinalou.

Inversións

Estas actuacións desenvólvense no marco do plan de investimentos de 18,5 millóns de euros co que o Goberno galego financia unha vintena de proxectos de construción, reforma ou ampliación de residencias, centros de día, vivendas comunitarias e centros sociais que dependen dos diferentes concellos. Un plan que está acordado coa Federación Galega de Municipios e Provincias (Fegamp) e dotado con fondos europeos procedentes do Mecanismo de Recuperación e Resiliencia (NextGenerationEU).