Para a Festa da Bica da Pobra de Trives, Mantesil e Coemusic organizan, coa colaboración do Concello de Trives, un xantar popular. A cita gastronómica terá lugar no patio do colexio CEIP Manuel Bermúdez Couso cun aforo de 500 persoas.
As entradas para o xantar do 50 aniversario da Festa da Bica de Trives, póñense a venda o vindeiro luns 26 de xuño, podendo mercarse no concello, na cafetería O Cafeto, no bar Sky, na pousada gastronómica A Cantina do Catro ou na Ferretería Medina.
“Esta será a segunda edición da Festa da Bica como celebración de Interese Turístico de Galicia. O doce é un produto gastronómico típico destas terras e que forma parte da identidade do municipio. Agárdase que un ano máis sexan centos os visitantes”, explican desde o goberno local.
Cun custo de 25 euros para adultos e de 15 para os menores de 12 anos, o menú do xantar popular inclúe empanada Cachena, becerro ao espeto con guarnición, viño, café e licores, e por suposto a sobremesa será coa auténtica protagonista do festexo, a afamada Bica de Trives.
