Forumemprego Universitario 2015 arrancou no campus de Ourense
Noemí Giráldez rematou o curso pasado Traballo Social e agora atópase desempregada, que non parada porque, salienta, “parar non paro de facer cousas, desde cursos a clases de idiomas”. O seu desexo é atopar un emprego e despois dun ano buscando en Galicia considera que a súa prioridade é intentalo fóra. Lurdes Losada, Sandra Iglesias e Alba Rivas son alumnas de primeiro curso de Educación Social. Elas non pensan aínda en buscar emprego pero si na posibilidade de facer algunha estadía no futuro no estranxeiro e teñen curiosidade por ver as posibilidades que teñen na tan nomeada mobilidade.
Elas e máis dun cento de persoas con un ou outro perfil déronse cita este martes no campus de Ourense no Forumemprego Universitario 2015 14 Xornadas Universitarias de Emprego de Galicia e Norte de Portugal, que un ano máis se celebra nos tres campus da Universidade de Vigo co obxectivo de achegar a estudantes e egresados os recursos necesarios para moverse do mellor xeito posible no contexto laboral e formativo europeo.
O Forumemprego Universitario 2015 está organizado pola Vicerreitoría de Estudantes a través da conselleira EURES(EURopean Employment Services) Transfronteirizo Galicia-Norte de Portugal da Universidade de Vigo, Emilia Seoane, contando o evento coa colaboración da Área de Emprego e Emprendemento da Universidade de Vigo, da Universidade do Minho e dos centros e campus onde se celebra.n
