O Barco propón catro obradoiros “Fiando a Memoria”

A Concellaría de Servizos Sociais, Igualdade e Sanidade do Concello do Barco repite este ano os obradoiros “Fiando a Memoria”, ca axuda da empresa Outonía, que se impartirán unha vez á semana en catro localizacións diferentes: Veigamuiños, Éntoma, O Barco e Viloira.

Mellorar a codificación, almacenaxe e recuperación da información serán os principais obxectivos das actividades que se propoñan no obradoiro, así como o aprendizaxe de técnicas de expresión artística, e participativas para recuperar a memoria individual e colectiva, exercicios de expresión oral e escrita e dinámicas corporais e de xogo.

Nesta ocasión, as sesións impartiránse os luns, no local da asociación de Mulleres Rurais en Veigamuiños; o mesmo día, na antiga escola de Éntoma; os mércores, na cuarta planta da biblioteca do Barco e tamén os mércores, no local da asociación de Mulleres Rurais de Viloira.

Máis de 40 mulleres participaron na edición do ano pasado, recuperando a figura das furracas en Éntoma, a memoria do río en Viloira, fixeron cartografías textís en Veigamuíños e reflexionaron sobre os espazos de encontro no Barco. As inscripcións poden facerse no Concello Vello ou no 988 684 885. Tamén está aberto o prazo de inscrición para participar no encontro “Con-fluencias” do venres na praza de Viloira, co Sil como protagonista.