Dez proxectos compiten por executar as obras de urbanización na aldea de Puxedo, en Lobios

A Xunta vén de recibir dez ofertas de empresas para executar as obras de urbanización de rúa na Vila e praza de San Antonio en Puxedo, en Lobios, cun investimento de preto de 148.000€.

As actuacións executaranse ao abeiro do Plan Hurbe, un programa impulsado polo Goberno galego co fin de axudar ás administracións locais a financiar diferentes tipos de intervencións urbanísticas. Segundo o convenio de colaboración asinado entre a Consellería de Vivenda e Planificación de Infraestruturas e o Concello, a Administración autonómica asumirá o 70% do orzamento e o Concello de Lobios achegará o 30% restante.

A intervención centrarase na mellora dun camiño que entronca cunha estrada provincial na zona de Puxedo. O obxectivo é humanizar a rúa e a praza mediante a mellora da pavimentación existente. Coa intervención, a contorna de protección manterá os seus valores ambientais, de modo que as actuacións que se levarán a cabo serán harmoniosas, integrándose os materiais, os sistemas construtivos e cromatismo.

O Plan Hurbe que desenvolve o Executivo autonómico contribúe a promover o desenvolvemento dos núcleos rurais da comunidade como motores de dinamización, ao converterse en puntos de localización dun importante número de servizos públicos e privados que permiten achegar o modelo urbano a todo o territorio.