Suso Díaz adica un poemario ás aldeas baixo as augas de Lindoso

O asolagamento hai agora 30 anos das aldeas de Aceredo, Buscalque, O Bao e Reloeira para a construción o encoro de Lindoso, entre os termos municipais de Entrimo e Lobios, protagoniza o novo poemario de Suso Díaz, “Asulagadas”. Publicado por Edicións Positivas, a obra escrita no galego que se fala no Val do Limia, aglutina os recordos dos pobos e a experiencia vital do autor natural de Ludeiros (Lobios).

Un total de 101 poemas compoñen o libro co que Suso Díaz persegue render tributo a toda aquela xente do val que tivo que deixar o seu fogar alá por xaneiro de 1992, cando a auga empezou a cubrir estes pobos situados á beira do Limia. Na última década e case de xeito periódico, como está a ocorrer neste momento, os restos daquelas construcións e outros vestixios que quedaron no lugar, emerxen do fondo do encoro revivindo a morriña polo fértil val perdido.