Barbadás mellora o firme das estradas municipais

O Concello de Barbadás vén de adxudicar por 75.340,65 euros a rehabilitación do firme da pista que une os núcleos de Parada e San Bieito. A empresa Excavaciones P. Prol será a encargada de realizar a intervención, que comezará no mes de setembro. A actuación inclúe a limpeza e reapertura de cuneta, rozado e limpeza dos bordos laterais do camiño, construción de bocas de pozo, demolición do pavimento asfáltico en cruces de estrada, escarificación do firme existente para regular a superficie, bacheo de zonas puntuais, reforzo do firme do camiño e colocación de sinais verticais, entre outras melloras.

“Queremos actual sobre o entorno rural, non so sobre os grandes núcleos", resalta o alcalde, Xosé Carlos Valcárcel

Esta obra dá conta do empeño do Concello de Barbadás por dotar aos núcleos do municipio do equipamento mínimo de infraestruturas. “Queremos actuar sobre o entorno rural, non só sobre os grandes núcleos”, resalta o alcalde, Xosé Carlos Valcárcel. O vial é sumamente frecuentado, sobre todo en certas épocas do ano, polo que a intervención facilitará a mobilidade de veciños e visitantes. “Nesta zona está ubicado un dos lugares máis senlleiros de Barbadás como é o Santuario do San Bieito de Cova do Lobo”, recorda Valcárcel.

Este proxecto únese ao anunciado hai uns días para a estrada que une o núcleo de Barxa, en Piñor co barrio de Vistahermosa, en Ourense. Neste caso están previstos 92.908,64 euros para a obra. A intervención será realizada pola empresa Extraco e arrancará durante o mes de setembro, cun prazo de execución dun mes. A intervención incluirá a limpieza de cuneta, fresado da superficie existente, rega de adherencia, pintado das marcas viarias ou levantamento de dous reductores de velocidade de 3 metros, entre outras melloras.