Barbadás “sobre rodas”

Un centenar de alumnos encheron as rúas de A Valenzá na mañá do xoves para celebrar o Día da Bici. Foron os nenos de 6º de Primaria dos CEIP Filomena Dato e O Ruxidoiro quen protagonizaron unha iniciativa impulsada pola Concellería de Educación, en colaboración coa Dirección General de Tráfico (DGT).

Subidos aos asentos da bicicleta e coa mente posta en darlle aos pedais, os máis pequenos do concello fixeron seus todos os espazos do municipio nun programa que se enmarca dentro do proxecto Camiño Escolar/Ruta Catalina.

Co obxectivo de concienciar ás familias sobre a utilización da bicicleta como un medio de transporte ecolóxico, seguro e saudable, o Día da Bici converteuse nunha xornada na que desfrutaron nenos e maiores.

“Ir en bici ao ao colexio é divertido, axuda a desenvolver a independencia, fomenta a actividade física e mellora a saúde mental da rapazada”, explica Marga Pérez, concelleira de Educación. É por iso que esta iniciativa foi gañada por participantes e quenes os acompañaron. Así, os pequenos ciclistas percorreron diversas rúas da Valenzá, tanto no tramo urbano coma ao carón do río. O concelleiro de Emerxencias, Daniel Rey, foi o encargado de guiar a actividade, na que tamén participaron docentes dos centros escolares, sumándose a unha iniciativa que puxo a Barbadás ”sobre rodas”. Para garantir a seguridade no concello, a Policía Local de Barbadás e Protección Civil ocupáronse de garantir a seguridade de todos os participantes na proba.

Ademais, a actividade contou coa presenza da xefa de sección de Seguridade Vial na Xefatura Provincial de Tráfico de Ourense, Estrella Garrido Calviño, quen fixo fincapé na importancia de respectar a normativa vial. Para concienciar e facer entender aos pequenos neste Día da Bici o necesario que é atender a todas as indicacións en materia de seguridade nas estradas, Garrido afondou nas indicacións que deben seguir para “conducir” con seguridade. “Ao coller a bici, vós tamén sodes condutores, e é moi importante conducir de forma segura e responsable”, explicoulle á rapazada.

O concello de Barbadás promove así unha conducción segura, sen deixar de impulsar o divertimento e a emoción entre os máis pequenos. Familias, docentes e alumnos do municipio desfrutaron dunha completa xornada de concienciación na que moitos dos asistentes xa anotaron a importancia da bicicleta e seguramente a convertirán no seu medio de transporte para os vindeiros meses de verán.