O BNG propón apoiar o turismo activo e de saúde no Carballiño

O BNG demanda promocionar o turismo activo e poñer en valor o Camiño dos Arrieiros no Carballiño, a través dunha moción que defenderá no próximo pleno do xoves. “O turismo activo e deportivo xera beneficios económicos e sociais para o noso concello, promovendo a creación de emprego e o desenvolvemento de infraestruturas turísticas sostibles”, sinala a portavoz, Sofía García.

A moción pretende promover un modelo turístico sustentábel que cuntribúa á diversificar a oferta turística, atraendo un tipo de visitante comprometido coa saúde, o benestar e a conservación do medio ambiente.

“Propomos implementar un turismo activo na vila que é unha forma de turismo que promove a interacción coa natureza, o exercicio físico e a aventura, fomentando a conservación da contorna e o desenvolvemento sostible das comunidades locais”, engade.

Con esta iniciativa tamén se demanda por en valor o Camiño dos Arrieiros e impulsar a creación de roteiros e circuítos turísticos que permitan aos visitantes gozar da natureza, a cultura, o deporte, a gastronomía e as tradicións locais, enriquecendo a súa experiencia de viaxe. O Carballiño, sinala a portavoz nacionalista, conta con inmensos espazos naturais nos que gozar da natureza e do deporte: Parque Municipal, o Parque Etnográfico, o xa citado Camiño dos Arrieiros ou a ruta de sendeirismo PR-G 79, entre outros.