Carballiño prepárase para recibir o Festival de Teatro Galego "Celso Parada"

O Festival de Teatro Galego-FETEGA "Celso Parada" desenvolverá no Carballiño do 23 ao 26 de setembro a súa 31ª edición co apoio da Xunta de Galicia e cunha carteleira dedicada integramente á escena do país, con espectáculos de sala, animación de rúa e unha Escola do Espectador como principal novidade das súas actividades paralelas.

Os organizadores do certame, que incorpora a Carlos Ledo como director, presentaron hoxe en Ourense toda a programación, nun acto no que, en representación da Consellería de Cultura, Educación e Universidade, participou o director da Axencia Galega das Industrias Culturais (Agadic), Jacobo Sutil.

A Casa da Cultura e o Auditorio Municipal Manuel María acollerán as representacións de Clausura de amor, de Cámara Negra Teatro; Os nenos da varíola, de Pérez&Fernández (os dous espectáculos coproducidos polo Centro Dramático Galego); O mel non caduca, de Ibuprofeno Teatro; A que non podes dicir Coca-cola?, de AveLina Pérez; Technologies, de Pedro Brandariz; Sexo débil...o carallo!, de Arantxa Treus; Sempre o pensaches pero nunca o dixeches, de Diana Sieira; e Proxecto Literarias.

Estas propostas integran o programa de sala, que, xunto ás sesións de teatro de rúa a cargo da compañía Barafunda, foron seleccionadas entre as máis de 100 propostas recibidas para participar no certame.