Curtametraxes de todo o mundo nas Xociviga do Carballiño

As Xornadas de Cine e Video de Galicia reconvértense en “Xociviga. Ano 0”, un Festival Internacional de Curtametraxes que incluirá 50 proxeccións de mais de 30 paises, algunhas das cales pasaron por prestixiosos festivais cinematográficos como Cannes, Venecia ou Berlín.

O evento terá lugar no Auditorio Manuel María entre o 20 e o 24 de novembro, con entrada de balde, e foi presentado onte polo concelleiro de Cultura, Diego Fernández, acompañado dos organizadores, Mario e Daniel Filloy.

O certame arranca o mércores 20 cunha retrospectiva sobre cine do director Pier Paolo Pasolini e outra sobre cine feito no Carballiño. Entre os días 21 e 23 de novembro proxectaráse unha selección de curtas infantís en sesión matinal na sección “Xermolar”. Polas tardes, ás 17,30, 19,00 e 20,30 horas terán lugar os pases da sección oficial, “Xentes”, que estará formada por curtas galegas e de outras partes do mundo, e a titulada “Xénese”, na que se poderán ver os traballos de novos creadores. Tamén o venres os directores de varias das curtametraxes participarán nun coloquio cos espectadores.

Ademais dos galardóns que otorgará un xurado profesional haberá un premio do público, culminando o domingo cunha sesión das curtas mellor valoradas polos espectadores e a entrega dos premios. Como actividade complementaria está en marcha un concurso de videoclips musicais organizado a través das redes sociais.