O Festival de Teatro Galego cumpre 26 anos no Carballiño

O Carballiño albergará entre os días 8 e 11 de setembro as máis importantes compañías teatrais de toda a comunidade. Serán catro días nos que o concello ourensán será un ano mais a capital do teatro galego, con programación e actividades de mañá, tarde e noite dirixidas a todas as idades.

A gran novidade deste ano será a estrea de "Arenteiro", unha montaxe cargada de humor e retranca, da man dos actores Carlos Blanco e Celso Fernández Sanmartín.

O FETEGA será escenario tamén doutros grandes das artes escénicas galegas, como Ibuprofeno Teatro, coa sua obra ‘O Furancho’, interpretada por Isabel Risco e Marián Bañobre; e Mofa e Befa, que dirixidos polo mestre Quico Cadaval subiranse ás táboas co seu ‘Bobas&Galegas’. A Compañía Floristería e Artesa Cía traerá ‘Eu encargábame dos nenos e o meu home da parte dos gastos’, unha montaxe moi actual sobre a desigualdade de xénero, protagonizada por Manu Fernández, Vicky Pérez e Laura Villaverde. Todas estas representacións terán lugar no Auditorio do Carballiño e o prezo de cada entrada será de 8 euros, aínda que hai desconto para os que desexen mercar para os catro días.

Todo isto completarase con actividades gratuitas para nenos, obradoiros ou actuacións de maxia.