Roteiros do Carballiño e Lalín, no Camiño Nós

Roteiros do Carballiño e Roteiros de Lalín realizaron onte a terceira etapa do Camiño a Santiago da Xeración Nós entre Carballiño e O Irixo con un total de 17 quilómetros.

A xornada partiu de Igrexa da Veracruz, cruzando o río Arenteiro pola Ponte Veiga, seguindo por Madarnás, Esgueva, a Insua dos Poetas e xa no Concello de O Irixo visitaron o Coucieiro, a Capela da Pena da Sela, a Igrexa de Dadín, entrando á localidade do Irixo polas Laxas e rematando na Ponte.

Corenta persoas participaron na actividade que ademais ao remate asistiron á festa gastronómica do Camiño Nós organizada polo Concello do Irixo, onde degustaron ovos con prebe e carne ó caldeiro que foi o menú que xantaron en 1926 Vicente Risco, Otero Pedrayo, Lois Feixoo, Antón Sanchez e Monxardín na casa do zapateiro do Irixo.

A seguinte etapa será no mes de setembro entre O Irixo e Vilatuxe, no campo da feira dos Carballiños. “Estamos encantados do resultado excelente que estamos obtendo facendo este Camiño a Santiago da Xeración Nós que ten moito que ofrecer”, sinalan.