“O soño dunha noite de verán”, premio Tiruleque

O Carballiño acollerá este sábado, 1 de novembro, a entrega do Premio Tiruleque á mellor obra da XVII Mostra de Teatro Amador, galardón que se dá á mellor obra da pasada edición e que recaeu en “Soño dunha noite de verán”.

O acto contará coa presenza da vicerreitora de Extensión Universitaria da UVigo, Susana Reboredo Morilla, e coas directoras da obra premiada, Casilda Alfaro e Sonia Rúa, acompañadas de sete dos actores e actrices que forman parte do elenco.

Representación

A entrega do premio terá lugar coincidindo coa representación de A Conspiración da piolla, do grupo Tiruleque, que se celebrará ás 20,00 horas no Auditorio Manuel María. A entrada para a función terá un prezo de 5 euros.

Esta cita dase no marco da XVIII Mostra de Teatro Amador “Terras do Orcellón”, consolidada xa como un referente cultural no ámbito teatral galego e que, edición tras edición, continúa fomentando a creación escénica. A programación da Mostra continúa ata o vindeiro 9 de novembro.