Javier Caldas será o novo presidente do PP de Celanova

Javier Caldas Otero será proposto para a presidencia da agrupación local do Partido Popular de Celanova, que se aprobará na próxima Xunta Directiva provincial, tomando así o relevo do ata agora representante dos populares Pablo Pérez, que seguirá como portavoz do grupo municipal celanovés.

A proposta de constitución desta nova xestora e do seu presidente foi acordada na reunión que mantiveron os afiliados da agrupación na sede do PP de Celanova, e na que participaron o presidente provincial, Luis Menor, e a secretaria xeral Sandra Quintas, ademais doutros cargos e representantes populares, entre eles o parlamentario galego e ex alcalde, José Luis Ferro.

Con este paso, dixo Luis Menor, o PP de Celanova afronta unha nova etapa na que o principal obxectivo non ten dúbida: “Preparar o partido para recuperar no 2027 a alcaldía que tantos anos dirixiu o Partido Popular”.

Pola súa parte, Caldas asegurou “que traballará para facer do PP local “un partido referente de unidade e consenso en torno a un proxecto político”. A favor xoga o tempo, dixo, “suficiente para planificar pero sen perder un instante”, sinalando entre os seus obxectivos organizar máis reunións periódicas.