O grupo Rebulir de Ramirás partirá o xoves cara a Bretaña francesa con 45 artistas

A provincia de Ourense, e máis concretamente Terra de Celanova, estará representada este ano no Festival Intercélitico de Lorient. Despois de 40 anos sen representación ourensá, o grupo Rebulir de Ramirás participará nun dos maiores festivais do mundo, que o ano pasado reuniu a preto dun millón de persoas na Bretaña francesa. A delegación, que parte o xoves 8 de agosto e voltará o luns 19, estará composto por 45 artistas nos que se inclúen músicos, pandereteiras, bailadores e unha representación do Entroido con Pantallas, Peliqueiros, Bonitas e Folións.

Cada noite, actuarán ante 15.000 persoas no estadio de Montoire e participarán no gran desfile das nacións celtas con preto de 100.000 espectadores e retransmitido na televisión francesa. Desde Rebulir asumen este reto con responsabilidade e ilusión a partes iguais, sendo este un dos maiores proxectos nos que se teñen embarcado.