Un libro plasma a Galicia imaxinada de Carlos Velo

“Imaxes para unha película” é a nova publicación editada pola Fundación Carlos Velo para seguir visibilizando o legado do cineasta de Cartelle. Trátase dunha peza literaria singular, imaxinada no seu momento por Velo como futuro guión cinematográfico e que acabou publicando na revista Vieiros que dirixiu xunto con outros dous ourensáns, Luis Soto e Florencio Delgado Gurriarán.

A presidenta de honra e a presidenta da Fundación, Laura Gardos Velo e Carmen Leyte, xunto co patrón da fundación e secretario da Asociación de Casas Museo e Fundacións de Escritores, Antonio Piñeiro, presentaron onte a publicación, a quinta editada pola fundación de Cartelle e baixo a supervisión de Xosé Enrique Acuña.

A biblioteca Nós de Ourense acollerá este xoves un coloquio sobre a correspondencia con Neira Vilas

Trátase dun traballo en galego e castelán, no que Velo afonda no mundo tradicional galego, con ilustracións de Cristina Villaverde Ruiba, na cal reflexiona sobre a cartelería histórica de diferentes filmes clásicos. A presentación do novo libro non será a única actividade prevista pola Fundación Carlos Velo para esta semana.

Correspondencia

O vindeiro xoves, 31 de outubro, a Biblioteca Pública Nós de Ourense acollerá, ás 19,30 horas, un coloquio ao redor da correspondencia que tiveron na emigración o escritor de Vila de Cruces, Xosé Neira Vilas, e o cineasta nado en Cartelle. Na mesa intervirán Fernando Redondo Neira, presidente da Fundación Neira Vilas e neto do escritor, e Mónica V. Lopo, xornalista e membro da Fundación Carlos Velo que, tras a presentación de Carmen Leyte, achegarán ao público esa amizade de dous intelectuais galegos na diáspora. Dende a fundación, lembran que Neira Vilas e Velo, un dende Cuba e outro dende México, “mantiveron unha froitífera correspondencia” e, a través desta amizade, o autor de Memorias dun neno labrego chegou a publicar algúns dos seus contos e poemas en Vieiros.