Modesto Vispo Pateiro: "Bailaríns que suman 13 campionatos do mundo acudirán ao noso festival"

O Festival Baila Conmigo, que leva xa 16 edicións, será o pistoletazo de saída ao verán en Celanova os días 14 e 15 de xuño. Un evento que o ano pasado reuniu preto de mil persoas entre as clases maxistrais no Claustro Barroco, a exhibición no Auditorio Ilduara e o baile social posterior. Modesto Vispo é o presidente da asociación organizadora do evento.

Como se presenta esta edición?

Despois do vivido o ano pasado, do subidón brutal de ter ao mellor do mundo como é Johnny Vázquez, a xente pode pensar que non se pode superar. Pero este ano, polo escenario pasarán bailaríns que suman 13 campionatos do mundo, nove de salsa e catro de bachata. Non hai moitos eventos que os teñan.

Que poderán atopar os asistentes?

Abrimos o venres na Praza Maior con clases gratuítas, baile social e o concurso “Baila Baila”. Este ano démoslle un impulso, con premios económicos, e xa temos seis parellas inscritas. O sábado, durante o día haberá clases no claustro barroco, tres salas (unha para infantil) e en nivel aberto de salsa, bachata e kizomba. O festival, pola noitiña, no Auditorio Ilduara, contará con 22 exhibicións, entre os cales estarán os mellores bailaríns de bachata de Galicia, os campións de España e cabeza de cartel que son Luis Chávez e Alba Ibáñez… Imos ter un gran nivel en bachata, aínda que é un evento máis ‘salsero’.

Os bailes latinos non pasan de moda?

A moda segue. Cando empezou fai 20 anos era todo salsa. Agora está de moda a bachata. Ten un tirón brutal.

A nivel local, cantos alumnos tedes na escola?

Entre Celanova, Ourense e a Baixa Limia, preto de 130 alumnos. Este sábado, ademáis, celebraremos a última festa da tempada. É unha das actividades que retomamos tras a pandemia. Unha vez ao mes, reunímonos para bailar e compartir fóra das clases. Un evento que tamén trae xente á Celanova.

Que orzamento manexades para esta edición?

16.000 euros. Contamos co apoio do Concello e tamén da Deputación, imos a un concurso e sempre con boa puntuación. Somos o evento máis antigo de Galicia e de España. Non fomos os primeiros, pero aquí seguimos e, si non fóra pola pandemia, este ano alcanzariamos a maioría de idade. Tamén agradecer as empresas e negocios de Celanova, sen o seu apoio, non poderíamos manter estes prezos con clases a todo o día a 30 euros ou un pase completo (clases, exhibición e baile), 45 euros. Noutros eventos similares, o prezo ronda os 90 euros.