Reyes Rodríguez, escritora: “Sen o despoboamento, A Limia Baixa tería o ambiente ideal para manter o galego”

A casa do concello de Entrimo acollerá o sábado día 1 ás 17,00 horas a presentación do libro de Reyes Rodríguez, “A Limia Baixa. Onde o mundo se chama en galego”, un traballo sobre a situación sociolingüística da mocidade na comarca.

Como xurdiu o libro?

A raíz da tese, que defendín no 2022, da fala da Limia Baixa. Neste caso son materiais modificados e actualizados a 2023, sobre a situación sociolingüística da mocidade (a tese abarcou toda a poboación). Conseguimos chegar a case a ⅔ dos rapaces (grazas a colaboración do IES), para coñecer cal é a súa posición en canto ao galego e as demais linguas en contacto nesta comarca, as súas actitudes cara a o galego e cara as demais, que contacto teñen co portugués... ese tipo de cousas.

E que fala a mocidade?

Á vista dos últimos datos do IGE podemos dicir que A Limia Baixa é unha das excepcións. Aquí seguimos mantendo case 80% de rapaces galego falantes. A mocidade baixolimega segue sendo monolingüe en galego e coa intención de seguir. En plena adolescencia, falan en galego coas amizades e nas conversas de WhatsApp. Iso é un campo de cultivo moi bo para manter esta estabilidade.

A que se debe?

A parte das causas individuais persoais, é certo que hai unha serie de factores que favorecen este mantemento. Creemos que a nosa non proximidade -lonxe das cidades, da vila-, fai que teñamos moito contacto entre os concellos. Tamén cremos que é unha zona que ten unha pequena supervivencia, temos todo alí. E a convivencia con Portugal a través das feiras. Os estranxeiros que chegan á zona, en cuestión de pouco tempo, son galego falantes porque o ambiente é de galego no bar, no supermercado, na rúa, nas aldeas. Despois a escola é un factor moi galeguizante, case o 90% falan exclusivamente en galego, o están facendo ben. Oxalá que non existirá o despoboamento, sería o ambiente ideal para manter o galego.

Falas en plural…

Si, porque teño que falar dos meus directores de tese, Xosé Henrique Costas e Alexandre Rodríguez Guerra, que estiveron dende un principio comigo e foron partícipes en todo o momento.

Como vivirás este sábado?

O meu desexo era facer a presentación no meu concello. Espero ver moitas caras desas persoas ás que entrevistei e me seguiron nestes anos. Oxalá consiga devolver e agradecerlle a esa xente todo que me deron para describir o que pasa nesta zona e para que o valoren, lingüisticamente e no social. O están facendo ben.