Abre o prazo para inscribirse na escola de verán verinense

O Concello de Verín vén de abrir o prazo para inscribirse no programa deportivo Escola de Verán 2019. Trátase dunha iniciativa lúdico-deportiva que se desenvolverá entre o luns, 1 de xullo, e o venres, 30 de agosto; e está deseñada para un máximo de 200 menores nados entre os anos 2005 e 2015.

As actividades incluidas no programa celebraranse polas mañás, entre as 09,30 horas e as 13,30 horas, e repartiranse por franxas de idades -de 4 a 14 anos e de 7 a 14 anos-. Será posible participar tres ou cinco días á semana nas actividades propostas, que se desenvolverán entre o Pavillón Municipal de Deportes e as piscinas de A Granxa. Tamén haberá un grupo de fútbol e de fútbol sala.

Entre outras actividades, os cativos disfrutarán de xogos predeportivos, rutas de sendeirismo, obradoiros, cine, actividades de ocio e de tempo libre e tamén acuáticas.

O primeiro día da Escola de Verán haberá unha xuntanza informativa para os pais de todos os participantes, que terá lugar no Pavillón de Deportes ás 09,30 horas. Ao rematar a charla, os menores irán ás piscinas descubertas. As inscricións terán que realizarse nas instalacións do propio pavillón de deportes en horario de 09,00 horas a 14,00 horas. Haberá que entregar a folla da solicitude, unha copia do DNI e o xustificante do pagamento das taxas.