A acrópole de Monterrei e o seu patrimonio recibiron case 14.000 visitantes este verán

Nesta pasada tempada estival, o conxunto monumental de Monterrei rexistrou entre os meses de xuño e setembro 13.951 visitantes interesados non só no castelo, senón tamén noutros recursos turísticos da comarca.

Estes datos, que proveñen das estatísticas recollidas polo servizo de Turismo de Monterrei, tamén reflicten que a actividade turística viviu o seu punto máis álxido entre os meses de xullo e agosto, con preto de 9.000 visitantes.

A actividade que espertou maior interese entre as persoas que pasaron pola oficina turística durante o verán foi a de coñecer a acrópole de Monterrei mediante o servizo de visitas guiadas.

Estas inclúen un percorrido no que se poden descubrir as distintas liñas da muralla, o interior da igrexa de Santa María de Graza, o exterior do pazo dos condes de Monterrei, a praza de Armas e a torre da Homenaxe.

Procedencia dos visitantes

A meirande parte dos visitantes proviñan doutras zonas de Galicia, tal e como ocorre durante o resto do ano, se ben aumentou o número de turistas procedentes do resto do Estado, con especial énfase os do centro da península.

Entre as procedencias internacionais máis frecuentes, os portugueses seguen a ser os primeiros, aínda que tamén se rexistraron visitantes de orixes tan dispares coma Nova Zelanda, Israel, Australia ou o Reino Unido.

Os anglosaxones son unha presenza cada vez máis habitual, ben porque fan rutas polos Paradores, ou porque viaxan en autocaravana. Os estadounidenses, pola súa banda, amosan interese pola viño da contorna.