O BNG denuncia o “desleixo” da rúa Central de Albarellos

CONCELLO DE MONTERREI

O BNG no Concello de Monterrei, a través do seu voceiro e concelleiro na oposición, Alberto Rodríguez, vén de denunciar o mal estado da rúa Central da parroquia de Albarellos

Estado dalgúns treitos da rúa, con area e fochancas.

O escrito presentado ante o Concello sinala que a devandita rúa “leva case un ano levantado por mor dunha avaría que tivo lugar o ano pasado”.

O estado da vía provoca “situacións incómodas para os veciños, algúns dos cales teñen unha fochanca fronte á súa casa e entran dentro dela cos pés cheos de terra cada día”.

Segundo o propio Rodríguez, o veciño que vive nese treito da vía é “unha persoa avellentada, con problemas de mobilidade, e xa ten tropezado aí máis dunha vez”. Para o nacionalista, a situación “non é de recibo, que esa persoa leve un ano con iso diante da porta”.

Ademais, o voceiro engade que “hai suficientes obreiros e profesionais no concello para contratar e arranxar iso”.

Consultado por La Región, o alcalde do Concello de Monterrei, o popular José Luis Suárez, afirma que “a única realidade é que non tiñamos persoal para facer este e outros arranxos. Pero dende hai uns 20 días xa fixemos a selección de traballadores, e estas obras están xa na súa orde de traballo e levaranse a cabo cando toque”.

“O que máis quixera eu é non ter ningunha fochanca nin rotura, pero as circunstancias son as que son, non hai máis”, conclúe Suárez.